Mingration Live

Wo samma? Do samma! Wo samma? Do samma!
Wo samma? In Minga!
Minnnn-gaaa! Munich! Monaco! Munique! Mmmm… ünchen!
Woast wos zugroast hoast?
Zuagroast hoast …
Du kennst di zuallerst a moi überhaupt ned aus, weder hint no vorn
Bist wahrscheinlich a wengai verlorn
wei du bist wo anders geborn
die Unterschiede san enorm
so richtig kenna duasd no koan
des geht ned von heid auf moang
aber mach da koane Soang
Weil: Minga mog di!
Und a bissl wos geht ollawei!
Also schau vorbei
und hau die nei
und drau die fei
Ganz wuascht wost herkimmst: aus Kabul, aus Peking oder von de Preißn
du brauchst da nix scheißn!
Scheiß da nix dann feid da nix!
Woast wos zugroast hoast?
Zuagroast hoast …
du woaßt no ned so recht wias lafft
und du schaust wira Schwaiberl wenns blitzt
weil du host da a U-Bahnkarten kafft
und du woast ned genau, is des a Witz
oder … Ja wos schaust do mi so o?!
Es gibt koan der oan kennt der die MVG-Tarife erklärn ko
und I konn da des Münchner Verkehrtsystem a ned erklärn
I dads ja gern
Aba I bin weder da Gandalf no da Herr der Ringe
Ja wos moanst wia vui Zeit I mehr verbringe
wegen dieser 16 Ringe! 16 Ringe!
Vier moi so vui wia Audi …
S- & U-Bahn-Fahrn in Minga is ois andre als a Gaudi
Argh, der Automat, de dumme Sau de!
Nimm hoid mein Zwanzger endlich o!
Nimm jetzt den Zwanzger und sei froh!
Ja so wia heid hoda si ja no nia blogt
und der sexy Sachse hinta dir sogt
»Na das wa ja ma wida n Scheiß-Doch!«
Aba du sogst nua: »I hau mi no obe zum Eis-Boch!
Zu de Naggadn und zu de Surfer!«
Minga is zwar a Waidstod, besteht aber aus lauter kloane Dörfer
und du findst scho no dei Dorf, dein Blotz und deine Leid
vielleicht no ned glei heid
sdauert hoid sei Zeit
bis zur Münchner Freiheit, und ...
Ja bist scho hoas dasd woast wos zuagroast hoast, ha?
Zuagroast hoast …
du brauchst erst amoi a Wohnung!
Also schau di einfach nua kurz um
Nimm da wos da gfoid
a coole Bude findst scho boid
Äh, ja, der Mietpreis der is koid …
Ach, wer des ganze zoid?
Ha! Du stehts bestimmt do und denkst da:
»400 € für 10 Quadratmeta ohne Fensta?!
Ja geläck, des gibts doch ned!«
Doch des gibt’s! Also schau dasd wos dagreist
und ärger di ned zu sehr übern Preis
sondern gfrei di, dads jetzt do bist – Mei des gfreit mi das de gfreist!
Wos host dn do für a weiße Tütn?
Ach, Du warst gestern beim Dallmayer?!
Ja dann ... bist du auf jeden Fall Bayer
Und brauchst da nix denkn – da Kaffee is überall deier
Jaja, I merk scho, de Stod de losst di so schnai nimmer los
Red ruhig moi mim Baby Schimmerlos
der verzaihd da a bo Gschichtn von de Laid – ja faids den weid?
»Kuck ma Schatz, ne neue Brille fürs Haar! Wie wunderhaft und fabelbar!«
Oah! De Schicki-Micki-Tussis homm vielleicht a bruin, aba koa brain!
De soidn moi oans bschdain!
De griang doch sonst nia gnua!
Aba denk da nix, des keat dazua!
Hauptsach Minga mog di und da Monaco Franze mog di aa
und scho boid gähst mit am megaliabn Münchner Madl
auf dnacht über‘d laare Theresienwiesn
es wird glacht und ihr deads de Momente genießen
und sie duad ned lang umanand sondern nimmt die bei da Hand
und zoagt dia a ganz a unbekannts Land
dir kimmts fast scho traumhaft via
du hosd Schwammerl in die Knia
aber: Scheiß da nix, dann feid da nix!
Minga mog di und da Schwammerl König mog di aa
und scho stätz ihr zwo Spotzln Hand in Hand vor der Bavaria
Sie sogt: »Mach deine Augn zua«
Du denkst: »Ja da war I ja
schee, bläd, wenn I ma des jetzt ned traun dua …«
Also traust das
weil du brauchst das
und oans des guid auf jedn Foi
Glücklich wead ma überoi
ganz wuascht in waichna Stod
solang ma oan hod
den ma mog und dea oan mog
und die Wiesn bebt
weil in Minga do wird glebt
do wead danzt auf Riesen Bierbänk
ja des hättst da ja nia denkt, »Boah!«
Wo samma? Do samma! Wo samma? Do samma!
Wo samma? Im Biergarten in Minga!
»In Minga deam ma dringa bis ma nimma kinna.«
»Bestell ein schnelles Helles, dann leuchtet München!«
Prost, Prost, Prost! Das de Gurgl ned verrost!
Mia san mia, a wenns a wengai kost!
»Fünf Mass kon ma leicht dringa und dann laicht Minga!«
Ein Prosit der Gemütlichkeit!
»Na fürs Saufen hamse immer Zeit!«
Ja freilich, und Winter wird es wenn es schneit!
Wichtig ist, dass man sich gfreit!
und das ma woas wos zugroast hoast
I hoff, dass du des lernst
Also nimm die Stodt ned immer so bierernst,
geh einfach raus, scheiß da nix und trau di
dann weast schnai seng: Minga is a lebenswertes Riesen-Baggal Gaudi!
(de geile Sau de)